تاند(دوشنبه، د حوت ۲۳ مه) په وروستیو کې د برېښنا د پرچاویو له کبله د یو شمېر صنعتي ښارګیو د فابریکو کار په ټپه درېدلی و خو اوس د افغانستان د صعنت کارانو ټولنه وايي چې اکثرو فابریکو بېرته کار پیل کړی دی.
د افغانستان د صنعت کارانو ټولنې نن (دوشنبې) وویل چې د کابل، ننګرهار، بلخ او غزنی ولایتونو د صنعتي پارکونو د برښنا ستونزه حل شوې او په تولو فابریکو کې صنعتي کارونه بېرته پیل شوي دي.
د افغانستان د صنعت کارانو ټولنې مرستیال عبدالجبار ساپی وايي، د وسپنی ویلي کولو، پلاستیکي توکو او پایپونو جوړولو پنځوس سلنه فابریکې، چې له دوو میاشتو راهیسي د برښنا د نشتوالي له امله له کاره لوېدلې وې، بیرته فعالې شوې او تولید یې پیل کړی دی.
د افغانستان بریښنا شرکت ژمنه کړې چې صنعتي پارکونو ته به په منظم ډول بریښنا برابروي او د فابریکو خاوندان به هم پر خپل وخت د برښنا پیسی ورکړي.
د صنعت کارانو د ټولنې د معلوماتو له مخې، اوس د برښنا په برخه کې د صنعتي پارکونو نوي سلنه ستونزې حل شوي او یوازې لس سلنه نورې به په لنډ وخت کې هوارې شي.
دلړم یا عقرب په میاشت کې د افغانستان برښنا شرکتد یو شمېر صنعتي او تجارتي پارکونو برښنا په دې خاطر پرچاو کړه چې د برښنا محصول یې نه و ادا کړی
خو اوس چې په غزني، کابل، بلخ او ننګهار کې د برښنا د پرچاوۍ د ستونزې د حل کېدو له کبله صنعتي پارکونه بیا فعال شوي، سلګونه وزګاره شیو کارګرو ته بیا د کار زمینه برابره شوې ده.