تاند(شنبه، د حوت ۲۱ مه) د افغانستان بانک وايي، افغانستان ته د نړیوالو د نغدو پیسو د مرستو په لړ کې ۳۲ ملیون ډالره نور راورسېدل.
دا پیسې، چې اتلسمه جوپه ده او د افغانستان نړیوال بانک ته سپارل شوي، په افغانستان کې د اقتصادي وضعیت د ښه کېدو او په بازار کې د نغدو پیسو د ډېرېدو په هدف رالېږل شوي دي.
د افغانستان بانک د خبرپاڼې له مخې، د سږ کال له پیله تراوسه پورې په اتلس جوپو کې ۴۷۰ ملیون ډالره د افغانستان نړیوال بانک ته سپارل شوي دي.
تر دې وړاندې ګڼو نړیوالو موسسو شکایت کاوه چې افغانستان ته پیسې نه شي انتقالولی او له همدې کبله محتاجو خلکو ته د مرستو په رسولو کې له جدي ستونزو سره مخامخ دي.
په افغانستان کې د ملګروملتو د پراختیايي پروګرام رييس عبدالله الدرداري هم په وروستیو ورځو کې ویلي و چې په افغانیو د ډالر په بدلولو کې د افغانستان بانک د پاتې راتلو له کبله دا پروګرام له خپلو هغو ۱۳۵ ملیون ډالرو څخه، چې افغانستان ته یې انتقال کړي دي، کار نه شي اخیستلی.
خو د افغانستان بانک د ښاغلي الدرداري څرګندونې رد کړې.
افغانستان ته د ډالرو له راتګ سره د افغانیو ارزښت، چې د پخواني حکومت له پرزېدو وروسته سخت ټیټ شوی و، په نسبي ډول بېرته ښه شوی دی.