تاند:(چارشنبه، د حوت ۱۸ مه) د طالبانو وياندويان وايي، چې د بهرنیو چارو وزیر مولوي امیرخان متقي د یوه پلاوي په مشرۍ د ترکیې د بهرنیو چارو وزیر چاوش اوغلو په رسمي بلنه ترکیې ته روان شو.
د متقي وياند عبدالقهار بلخي ویلي چې متقي به په ترکیه کې د انتالیا په دیپلوماتیک فورم کې ګډون وکړي او هلته به د افغانستان په اړه ګډونوالو ته د وینا تر څنګ په یوه بحث کې ګډون وکړي او ورسره به د ترکیې او د نړۍ د مختلفو هیوادونو له راغلیو لوړ رتبه هیئتونو سره ناستي او د افغانستان په اړه خبرې وکړي.
د انتالیا فورم د مارج له ۱۱ څخه تر ۱۳ پورې د (ډیپلوماسۍ بیا تعریفول) تر سرلیک لاندي جوړیږي.
سرچينې ويلي: د فورم افتتاح د ترکیې د ولسمشر رجب طیب اردوغان په وینا کیږي او وروسته د مختلفو هیوادونو د بهرنیو چارو وزیران او لوړ رتبه چارواکي وینا او د مختلفو موضوعاتو په اړه بحثونو کې ګډون کوي.
معلومه نه ده چې متقي به د دې سفر پر مهال نورې کومې لیدنې- کتنې ولري.
ترکیه لېواله ده چې په خپله خاوره کې مېشت افغان سياستوال له طالبانو سره د ګډ حکومت جوړولو ته وهڅوي، خو طالبانو په دې اړه د ترکیې رول ته ډېر فرصت نه دی ورکړی.
د ترکیې د بهرنیو چارو وزیر چاووش اوغلو یو ځل مخکې د همداسې اجنډا په ملتيا کابل ته سفر هم درلود.
ترکیه له قطر سره یوځای د کابل او د افغانستان د نورو هوايي ډګرونو په عملیاتي چارو کې برخې اخیستو ته لېواله ده.