تاند:(دوشنبه، د حوت ۱۶ مه) چینايي چارواکو ويلي چې د افغانستان د وضعیت په اړه یې د سیمې د هېوادونو د بهرنیو چارو وزیرانو په کچه درېيمه غونډه بللې ده.
د چین د بهرنیو چارو وزیر وانګ يي ویلي چې د دې غونډې موخه د افغانستان له ثبات او امنيت سره مرسته ده.
چینايي مقام له افغانستان څخه د امریکايي ځواکونو د وتلو بهیر نا مسوولانه ګڼلی او پر هغه د نیوکو ترڅنګ یې ویلي چې دا ډول وتل په سیمه کې د سترو امنیتي ننګونو د رامنځته کيدو سبب شوي دي.
د چین د بهرنیو چارو وزیر دغه راز ویلي، چې هېواد به یې ژر د افغانستان د وضعیت په اړه د سیمې د هېوادونو د بهرنیو چارو وزیرانو د غونډې کوربه وي.
د سرچينې په وينا، په دې غونډه کې به د افغانستان د بشري ناورين د حل لپاره د مرستو تر څنګ په سيمه کې د امنيتي اندیښنو د حل په اړه خبرې وشي.
تر دې مخکې په ايران کې هم د افغانستان د ګاونډيانو د بهرنيو چارو د وزیرانو ورته غونډه جوړه شوې وه.
طالبانو د چينايي وزیر څرګندونو ته کوم غبرګون نه دی ښودلی.
طالب چارواکو تر دې مخکې له افغانستان څخه د سیمې او نړۍ هېوادونو ته د امنيتي ګواښونو د پېښېدو انديښنې رد کړې وې.