تاند (شنبه/د کب ۱۴مه) — په ټولنیزو رسنیو خپره شوې یوه ویډیو ښیي چې د ختیځ ولایت ننګرهار په مرکز جلال اباد ښار کې د پاکستان سفیر ته ور په سر کېدونکې لونګۍ د هغه په سر له اېښودل کېدلو نه مخکې په ځمکه ولوېدله.

ویل کیږي چې د پاکستان سفیر ته په جلال اباد ښار کې د هغه هېواد یو شمېر جاسوسانو وړمه ورځ د درناوي لونګۍ ور په سر کړه خو دا یې ونه ویل چې دا کار یې د هغه د کوم خدمت په بدل کې وکړ.

په خپره شوې ویډیو کې د لونګۍ وړاندې کوونکي دوه کسان له کمره مین څخه غواړي چې دغه صحنه رسنیو ته ونه باسي او ډیلېټ یې کړي.

د زیارمل افغان په نامه د فیسبوک یوه کاروونکي له خپرې شوې ويډیو سره لیکلي، «د وطن د سوداګرو له لاسه پګړۍ غورځېږي، خو د پنجابي سفیر سرته نه رسېږي. پګړۍ لا خپل برم ساتي! خو افسوس په دغو سپین ږیرو.»

په جرمني کې مېشت د ټولنیزو رسنیو یوه فعال محمد ناصر ناصري لیکلي، « له دې شته خلکو نه لونګۍ کې غیرت ډیر ده. د خپل دښمن په سر نه غواړي پاتې شي.»

په دیپلوماتیک ډګر کې د طالبانو د تجربو د نشتوالي یا بې زړه توب امله، منصور په افغانستان کې د برتانیا د وخت د وایسرای په څېر د نړۍ والو ادارو له استازو سره ګوري او داسې ښیي چې د افغانستان په بهرنیو اړیکو کنټرول لري.

پاکستاني سفیر ته د طالبانو د واکمنۍ پر وخت د درنښت لونګۍ په داسې حال کې ور په سر کیږي چې اسلام اباد د طالبانو د تېرې دورې سفیر عبدالسلام ضعیف چې دیپلوماتیک پاسپورټ او پاکستانۍ وېزه یې په لاس کې وو، په بې ساري سپکاوي خرڅ او په کش کولو امریکایانو ته په لاس ورکړ.