تاند: ( يکشنبه ، د کب لومړۍ) د طالبانو د حکومت روغتيا وزارت تایید کړه، چې څه باندې پینځه نیم زره افغان ماشومان په شري ناروغۍ اخته شوي دي.
د دغه وزارت ویاند «جاوید هژیر» ويلي، چې کندهار ولايت په دې برخه کې د ۶۸۰ پېښو له ثبت سره په يادې ناروغۍ تر ټولو ډېر اخته ماشومان لري.
جوزجان له کندهار څخه وروسته د ۴۳۵ پېښو د ثبت او ۱۵ مړینو له ثبت سره د دویمو ډېرو پېښو، بدخشان د ۲۰۳ پېښو له ثبت او ۳ تنو له تلف کیدو سره درېیم او غور ولايت د ۱۶۵ پېښو له ثبت او ۶ تنو تلف کيدو سره څلورم مقام لري.
مخکې ځینو رسنیو په بدخشان کې طالبانو د روغتيا رييس قاري محمد نذیر د شري له کبله د ۱۷۵ ماشومانو د مړینې خبر ورکړی و.
د نړيوال روغتيايي سازمان ویاند مارګارت هريس بيا ويلي، چې په افغانستان کې بشري ناورين او د ماشومانو پراخه خوارځواکي د دغه وضعيت اصلي لاملونه دي.
ياد شوي سازمان د شري ناروغۍ تر څنګ په دې وضعیت کې د نورو داسې خطرونو د زیاتوالي خبرداری هم ورکړی.
طالب چارواکو د یادې ناروغۍ د واکسین یا نورو تدابيرو په اړه څه نه دي ويلي.