تاند(شنبه، د دلوې ۲۳ مه) د روغتیا نړیوال سازمان وايي، په افغانستان کې شري د خپرېدو له کبله لسګونه ماشومان مړه شوي دي.
د دې سازمان له راپور سره سم، په افغانستان کې لسګونه زره تنه په شري اخته شوي او تر یو نیم سل ډېر ورڅخه مړه شوي دي.
د ملګروملتو د روغتیا نړیوال سازمان د جمعې په ورځ وویل، د شري خپرېدا په ځانګړي ډول له دې کبله د اندېښنې وړ دی چې په افغانستان کې خلک په پراخه پیمانه له لوږې او د خوراکي موادو له سخت کموالي سره مخامخ دي او له دې کبله ماشومان په ناروغیو په اسانه اخته کېدای شي.
د روغتیا د نړیوال سازمان ویندوی کرستیان لیندمایر په جینیوا کې خبریالانو ته وویل «د شري پېښې د افغانستان په ټولو ولایتونو کې د ۲۰۲۱ له جولای میاشتې را په دې خوا مخ په زیاتېدو دي.»
د ده په وینا په جنورۍ میاشت کې په افغانستان کې د شري ناروغۍ ۳۵ زره ۳۱۸ پېښې ثبت شوي چې د هغو په منځ کې د ۳ زرو تنو ناروغي په لابراتوار کې ثابته شوې ده.
په سلو کې د شري ۹۱ پېښې او په سلو کې ۹۷ مړینې تر ۵ کالو د کشرو ماشومانو دي.
مایر دا هم وايي چې د شري د ډېرو پېښو راپور نه دی ورکړای شوی او باور لري چې اصلي پېښې به تر دې ډېرې وي.
دی وايي، په جنورۍ کې د شري د پېښو زیاتېدا شيی چې له دې ناروغۍ څخه به د مړینو شمېر زیات شي.
شری خورا ساري ناروغي ده او ویروس یې په ځانګړي ډول پر ماشومانو حمله کوي.