تاند: ( شنبه ، د دلوې درويشتمه) د امريکا متحده ايالاتو څو چارواکو ویلي، چې د داعش ډلې د خراسان ځانګې د مشر ثناءالله غفاري په سر ټاکل شوې ۱۰ ميليونه ډالره جایزه د افغانستان طالبان هم ګټلی او تر لاسه کولای شي.
دغو آمریکایي چارواکو ويلي، چې په دې اړه دوی څو ځلې طالبانو سره غږيدلي هم دي، چې څنګه د داعش ډلې پر وړاندې پیاوړې مبارزه وشي.
د امريکايي چارواکو د اعلان په اساس، که طالبان هم د غفاري په اړه معلومات شريک کړي، اعلان شوې ۱۰ میلیونه ډالره جایزه به ورکړل شي.
امريکايي مقاماتو دا هم ويلي، چې طالبانو سره ېې په دې اړه خبرې د دوحې تړون له مخې روانې دي او هڅه کیږي چې افغانستان بيا د ترهګرو په پټنځای بدل نه شي.
له دغو امریکايي چارواکو څخه یوه ېې ويلي، چې طالبانو هم د داعش ډلې پر ضد خپل تعهدات درک کړي او پر ضد يې مبارزه کې هڅه کوي.
طالبانو د امريکايي چارواکو د دغو څرګندونو ته او هم د داعش ډلې د خراسان ځانګې پر مشر د امريکا د جایزې ټاکلو په اړه غبرګون نه دی ښودلی.