تاند: ( دوشنبه ، د دلوې اتلسمه) د پاکستان ایکسپریس ټريبيون ورځپاڼې په يوه تازه مطلب کې له واک ته رسېدو څخه وروسته، له پاکستان سره د افغانستان د طالبانو د تحریک اړيکې ارزولي.
سرچینه زیاتوي، داسې ښکاري چې طالبانو ته د اسلام اباد صبر نور په ختمیدو دی.
دغه ورځپاڼه په پاکستان کې د تحریک طالبان پاکستان او بلوڅ بېلتون پالو وروستيو بریدونو ته اشاره کوي او وايي، چې پاکستان د دی بریدونو په زیاتیدو کې د افغانستان له خاورې استفاده يو اصلي عامل ګڼي.
د ورځپاڼې په حواله، پاکستان باور لري چې دا بریدونه ټول له افغان خاورې پلانیږي او تر سره کیږي.
ایکسپریس ټريبيون د پاکستان د پوځ د یکشنبې ورځې اعلاميې ته اشاره کوي چې لیکلي یې وو: ترهګرو د پولې له هغې غاړې له افغان خاورې څخه پر پوله ساتونکو پاکستاني ځواکونو په کرمه ولسوالۍ کې برید وکړ، چې ۵ سرتېري پکې ووژل شول.
د پاکستان د پوځ په اعلامیه کې راغلي، چې پوځ هم ترهګرو ته ځواب ورکړی او درانه تلفات یې ور اړولي دي.
د پاکستان پوځ په خپله دې اعلاميه کې له افغان خاورې د ترهګرو استفاده غندلې او ويلي، چې د افغانستان موقت حکومت باید په راتلونکي کې ترهګرو ته دغه اجازه ورنه کړي.
د ایکسپریس ټريبيون د شننې په اساس، دا لومړی ځل دی چې اسلام اباد په داسې ښکاره او ستغه لهجه د طالبانو حکومت ته داسې د ملامتۍ ګوته نيسي.
ایکسپریس ټريبيون زياتوي، چې پاکستاني چارواکو مخکې هغه بریدونه کمرنګه ښودل، کوم بریدونه چې ګومان کیده له افغان خاورې تنظيمیږي.
ورځپاڼه د بېلګې په توګه د طالب چارواکو له لوري د ننګرهار په ولايت کې د ډیورنډ کرښې د اغزن تار ايسته غورځولو ته اشاره کوي، چې پاکستاني چارواکو جدي ونه ګڼله او په خبرو یې د داسې ستونزو په حل ټینګار وکړ.
ایکسپریس ټريبيون د پاکستان د پوځ وروستۍ اعلامیې ته په اشارې ليکلي، چې د پاکستان صبر نور د طالبانو پر وړاندې تماميدونکی ښکاري.
سرچينې نه دي ويلي، چې پاکستاني چارواکي به په دې ادعا شوي صورت کې د طالبانو پر وړاندې څه ډول چلند ولري؟
د طالبانو حکومت او خپله پاکستاني چارواکو د ایکسپریس ټريبيون د دغې شننې په اړه کوم غبرګون نه دی ښودلی.
طالب چارواکو مخکې بيا- بيا ژمنه کړې چې افغان خاوره به د هیچا خلاف ونه کارول شي.
پاکستان خپل حقایق پټوي او طالبانوپر ضد به نوی پروژه جوړه کړي خو امارت باید نور ځان او دښمنان سم وپیژني او په خلکو تکیه وکړي.