تاند: ( دوشنبه ، د دلوې اتلسمه) د افغانستان د بیارغونې له بهیر سره د امریکا د مرستو د څار ځانګړې اداره ( سیگار) وايي چې طالبان د افغانستان په تعليمي نصاب کې د بدلونونو او ترې د ځينو عصري مضامينو د ايسته کولو پلان لري.
یادې ادارې د طالبانو د ښوونې او روزنې کميسيون ارزونې ته اشاره کړې، چې د افغانستان د تعلیمي نصاب په اړه یې کړې ده.
په دې ارزونه کې راغلي، چې د « هنرونو» او « فرهنګي او مدني زده کړو» مضامین دې په تعليمي نصاب کې نه وي.
په يادو کتابونو کې د ټاکنو، اساسي قانون، دیموکراسۍ، بشري حقونو، موسیقۍ او داسې نورو متمدنو موضوعاتو په اړه بحثونه شوي.
د سيګار په حواله طالبان دغه بحثونه ويجاړوونکي او د اسلام پر ضد ګڼي.
د طالبانو د ښوونې او روزنې کميسيون په تعليمي نصاب کې د ځينو کسانو له نوم ياديدو سره هم مخالفت کړی او هغوی یې « جعلي اتلان» ګڼلي دي.
د سيګار د راپور په اساس، طالبان غوره ګڼي چې په تعليمي نصاب کې د جهاد، اسلامي روحيې، حجاب او ځینو نورو داسې موضوعاتو په اړه بحثونه زیات شي.
یو شمېر خلکو سیګار ادارې ته ویلي، چې د تعليمي نصاب د اصلاح موضوع نه بايد د افراطيت د ترویجولو د هڅو په مانا وي.
د طالبانو د حکومت مرستيال وياند بلال کريمي ويلي، چې هغه عصري مضامین له تعلیمي نصاب څخه نه ويستل کېږي، چې د زده کوونکو له ذهني ودې سره مرسته کوي.
هغه د افراطي افکارو د ترویج یا نه ترویج په اړه څه نه دي ويلي.