تاند: ( یکشنبه ، د دلوې لسمه) په بدخشان کې د « حريم زن» په نوم ځانګړې ښځينه راډيو له شپږ مياشتني ځنډ وروسته بیرته په فعاليت پيل وکړ.
د دغې راډيو د پیل په مراسمو کې د طالبانو د والي مرستيال مولوي نثار احمد احمدي او د اطلاعاتو او فرهنګ رييس معزالدين احمدي برخه لرله.
طالب چارواکو د راډيو مسؤولینو ته امر کړی، چې داسې نشراتو نه دې ډډه وکړي، چې د اسلام پر ضد ګڼل کیږي.
طالب چارواکو دا هم ويلي، چې د راډيو په خپرونو کې نه بايد نارينه او ښځينه سره وغږيږي.
د دې ترڅنګ طالب چارواکو د راډيو مسوولینو ته ویلي، چې حجاب باید مراعت کړي.
د دغې راډيو د بيا فعالولو خبر په داسې مهال ورکړل شوی، چې د طالبانو له واکمنیدو سره په زرګونه ښځینه خبریالانې وزګاره شوي او په کورونو کې ناستې دي.