تاند: ( جمعه ، د دلوې اتمه) په ایران کې د نیمروز ولایت پولې ته څېرمه سلګونو ایرانیانو د يوه لاريون پر مهال له طالبانو غوښتي، چې د کمال خان بند اوبه ور خوشې کړي.
د دې مظاهرې پر مهال د ایران او افغانستان ترمنځ د ابرېشم غځیدلې تجارتي لاره هم د ټرافیکو پرمخ تړل شوې وه.
دغو مظاهره چیانو ویلي، دغه لار تر هغو نه پرانیزي چې په افغانستان کې د طالبانو حکومت له کمال خان بند څخه اوبه ورخوشې کړي نه وي.
بل لور ته: له نیمروز ولایت څخه د هغو افغان بار وړونکو موټرو د چلوونکو اعتراض رسنیز شوی، چې له ایران څخه افغانستان ته توکي واردوي.
دوی د طالبانو ځايي چارواکو ته شکایت کړی، چې ایراني معترضینو یې د موټرو ښيښې ماتې کړي او سپکاوی ورته کړی.
ځايي طالب چارواکو دغو افغان موټر چلوونکو ته ويلي چې حق به یې واخلي.
کمال خان بند د افغانستان د بې واکه شوي ولسمشر محمد اشرف غني له لوري تر رغونې وروسته پرانیستل شو، چې ورسره ایران ته د بهېدونکو اوبو مخه ونیول شوه.
ښاغلي غني ویلي وو، تر هغو چا ته اوبه نه خوشې کېږي، چې د اوبو په بدل کې یې افغانستان ته پیسې نه وي ورکړي.
ده ویلي که ایران غواړي چې د افغانستان له اوبو استفاده وکړي، یا دې پیسې یا هم تېل افغانستان ته ورکړي.
د جدي پر ۲۸مه، د ایران دولتي رسنۍ صدا وسیما په کابل کې د ایران د سفارت د مرستیال حسن مرتضوي له قوله راپور ورکړ چې طالبانو د کمال خان بند اوبه ایران ته خوشې کړي، خو طالبانو دا موضوع رد کړله.
ولسمشر غني د واکمنۍ په وروستيو کې یې طالبان له پاکستان سره پر ډیورنډ او ايران سره د افغانستان پر اوبو په پټې معاملې تورن کړي او له دوی غوښتي وو، چې په دې اړه ملت ته وضاحت ورکړي.