هیلري کلینټن پر ط د فشارونو د زیاتیدو غوښتنه وکړه

تاند:( دوشنبه، د دلوې څلورمه) ‏د امريکا متحده ايالاتو د بهرنيو چارو پخوانۍ وزیره مېرمن هیلري کلینټن، چې په نړیواله کچه د ښځو د حقونو له مطرحو مدافعینو څخه ده، د افغان ښځو خلاف د طالبانو د ورځ تر بلې نابودونکو قيوداتو پر وړاندې غبرګون ښودلی.

نوموړې ويلي، چې هيله منه ده امريکا او متحدين يې پر طالبانو له فشار زیاتولو سره د افغان ښځو د ژغورلو لپاره ډېر ګامونه واخلي.

مېرمن کلينټن په تازه څرګندونو کې د افغان ښځو وضعيت ډېر اندیښمنونکی ګڼلی او ژمنه یې کړې، چې د دوی د حقوقو او تحصيل د زمینه برابرولو لپاره به خپلې ټولې هڅې وکاروي.

د مېرمن کلينټن څرګندونې په داسې مهال دي، چې ټاکل شوې نن د افغانستان د سولې لپاره د امريکا متحده ايالاتو ځانګړی استازی ټام ویست د امير خان متقي په مشرۍ د طالبانو لوړپوړي پلاوي سره په ناروې کې وویني.

د دې لیدنې او مذاکراتو اصلي اجنډا په افغانستان کې د ټول شموله نظام جوړیدل، د ښځينه او نورو حقونو تامينول، د ترهګرۍ پر وړاندې مبارزه او ورته نور اساسي موضوعات دي.

طالب پلاوي پرون د افغانستان له یو شمېر څېرو سره وليدل، چې د ښځينه فعالانو استازي هم پکې شامل وو.

ويل کيږي، چې د دې خبرو پر مهال طالب پلاوي د ښځو چارو وزارت د بیرته فعالولو ژمنه کړې، خو په کابل کې د ښځينه فعالانو له نیول کیدو منکر شوی، چې له دې کار سره یې د ښځينه فعالانو اعتراضونه زيات کړي.