تاند:( يکشنبه، د دلوې درېيمه) د افغانستان لپاره د ايران د ولسمشر ځانګړي استازي کاظمي قمي ويلي، چې هېواد یې له خپل قلمرو څخه د افغان ګازو او نفتو د ترانزیت درې مياشتينۍ اجازه ورکړې ده.
باختر خبري اژانس د دې خبر له خپرولو سره په دې اړه نور جزییات نه دي ورکړي.
ويل شوي، چې دا درې مياشتينۍ اجازه له روانې دلوې میاشتې څخه پیل او د نوي لمريز کال د حمل مياشتې تر پايه پورې دوام لري.
د ایران په ګډون د ګاونډيو هېوادونو سره د طالبانو د ډېرو داسې وروستيو معاملو په اړه خلکو ته دقیق جزییات نه دي ورکړل شوي.
تېره اونۍ ايران د طالبانو له لوري د دوی خاورې ته د کمال خان بند د اوبو د خوشې کیدو اعلان وکړ او له مننې سره یې د طالبانو د دې « پر قول دریدو» ویډیو هم خپره کړه.
طالبانو بيا په دې تړاو خبرونه رد کړل.
معلومه نه ده، چې افغانستان ته د ایران وروستی امتیاز طالبانو له هماغې معاملې سرچینه اخلي او که کوم بل اړخ لري؟