تاند:( شنبه، د دلوې دويمه) د افغانستان د نجات حرکت مشر او د ماليې پخوانی وزير ډاکټر عمر زاخېلوال له طالبانو غوښتي، چې د خپل حکومت د مشروعيت موندلو لپاره دې د نړیوال مشروعيت جوړولو پر ځای د خپل ملي مشروعيت د ترلاسه کولو لپاره هڅې چټکې کړي.
د هغه په وينا، طالبان که نړيوال مشروعيت غواړي، لومری باید د ملي مشروعيت د رامنځته کولو او بيا د ټاکنو زمينه مساعده کړي.
نوموړي د طالبانو ستونزه په دې برخه کې دا ښودلې، چې ملي مشروعيت ته د ډېرې پاملرنې پر ځای پر خپل نړیوال مشروعيت ډېر تمرکز کوي.
طالبانو په دې اړه، چې د ملي مشروعيت د پیدا کولو لپاره څه به کوي، څه نه دي ويلي.
طالب چارواکو د خپلې واکمنۍ او افغانستان د راتلونکې لار نقشې په اړه هم څه نه دي ويلي.
دا په داسې حال کې ده، چې له څو ورځو راهيسې د طالبانو له لوري د یوه ګډ حکومت د جوړولو لپاره د هڅو خبر ورکړل شوی او ويل شوي، چې دوی د نورو سیاسي لوريو د استازو په ګډون یوې ۱۲ کسيزې شورا ته د موقت حکومت د جوړولو او سپارلو په طرحې کار کوي.
طالبانو بیا دا موضوع تایید کړې نه ده.