تاند:( چار شنبه، د جدي نهه ویشتمه) د طالبانو د اوبو او برېښنا وزارت ایران ته د نیمروز د کمال خان بند د اوبو د خوشې کولو راپورونه رد کړل.

د طالبانو د دغه وزارت ویاند مولوي اختر محمد نصرت ويلي، چې د کمال خان بند اوبه ايران ته نه دي ورکړل شوي.

طالب وياند ويلي، چې يادې اوبه ایران ته نه، بلکې د نیمروز کروندو ته ور خوشې شوي دي.

د ایران رسنيو په کابل کې د خپل مرستيال سفير حسن مرتضوي او د افغانستان لپاره د ایران د ځانګړي استازي حسن کاظمي قمي په حواله دغه هېواد ته د کمال خان بند د اوبو د خوشې کیدو خبر ورکړی.

دغو ایراني چارواکو ويلي، چې دا کار تهران ته د طالبانو د بهرنيو چارو وزير مولوي امیر خان متقي د سفر پر مهال د نوموړي د ژمنې مطابق ترسره شوی، چې دوی یې منندوی دي.

د اوبو د چارو یو شمېر افغان کارپوهانو هم تاييد کړې، چې طالبانو ایران ته د کمال خان بند اوبه ور پريښي.

کارپوهانو په دې اړه ایران سره د شوې معاملې وضاحت غوښتی او پر طالبانو یې د داسې معاملو له کبله نیوکې کړي.

د ایران د حکومت اړوند تسنیم خبري اژانس بيا د کمال خان بند یوه ویډیو هم خپره کړې، چې طالب چارواکي پکې د کمال خان بند د اوبو پريښودو د نندارې په حال کې ښکاري.

دغه ویډیو پرون ناوخته خپره شوې ده.

ځينو شنونکو تر هر چا مخکې د ايران د استخباراتي سازمان اړوندې رسنۍ ته د یادې ویډیو رسیدل د پوښتنې وړ ګڼي او وايي، چې طالبان بايد ملت ته د داسې معاملو په اړه ځواب ووايي.

ايران له پخوا څخه افغانستان سره د اوبو د وېش په سر جنجال لري.

له افغانستان څخه د امریکايي ځواکونو د وتو سره هم مهاله، له بې واکه شوي ولسمشر محمد اشرف غني سره د ایراني چارواکو د دښمنۍ او له طالبانو څخه يې د پوځي او مالي ملاتړ يو اصلي دلیل د افغانستان د اوبو مدیریت ته د ښاغلي غني جدي هڅې ګڼل کېږي.

بې واکه شوي ولسمشر اشرف غني د جمهوري نظام له سقوط څخه مخکې په یوه وینا کې طالب مشران ننګولي وو، چې ملت ته بايد د افغانستان پر اوبو له ایران سره د خپلو پټو معاملو او پاکستان سره د ډیورنډ کرښې په اړه د خپلې پټې معاملې په تړاو ځواب ووايي.