تاند:( چار شنبه، د جدي نهه ویشتمه) د طالبانو د کورنيو چارو وزارت تامیناتي مرستیال مولوي محمد محسن هاشمي په کابل کې د خپلو جنګیالیو په ډزو د يوې وژل شوې نجلۍ د کورنۍ غمرازۍ ته ورغلی و
نوموړي د زینب عبداللهی په نوم د وژل شوې دغې نجلۍ د کورنۍ سره ۶ لکه افغانۍ مالي مرسته هم کړې ده.
طالب مقام نوموړی نجلۍ «:شهیده» ګڼلې او د قاتل د نیولو خبر یې هم ورکړی.
طالب چارواکي ويلي، چې د نجلۍ قاتل نه دا عمل « سهوآ» شوی، چې محاکمه به شي او که د قصاص حکم يې وشي، هم به یې تطبيق کړي.
د طالبانو د کورنيو چارو وزارت دغه مرستیال په خپره شوې ویډیو کې ویلي: موږ له همدومره دبدبې سره، چې ټوله نړۍ مو ماته کړې، د خپل « رعيت» په غم شریک یوو او اوښکې ورسره تویوو.
زینب عبداللهی د تېرې جمعې په شپه هغه مهال د طالبانو له یوه چیک پینټ څخه د دوی پر موټر په ډزو ووژل شو، چې کورنۍ یې یوه واده ته روانه وه.
دا پېښه د کابل په لويديځ مهتاب قلعه سيمه کې رامنځته شوه.
د یادې پېښې پر وړاندې په پراخه کچه اعتراضونه وشول او طالبانو یې په خلاف کابل کې د څو ښځینه لاریونونو د ترسره کيدو مخنيوی هم وکړ.