تاند:( چار شنبه، د جدي دوه ويشتمه) د ننګرهار د اطلاعاتو او فرهنګ طالب چارواکي وايي، چې د غلام جیلاني په نوم يوه فرهنګپال د ننګرهار له عامه کتابتون سره د څه باندې زرو ټوکو کتابونو مرسته کړې ده.

دوی د دغو مرسته شويو کتابونو په اړه ډېر جزییات نه دي ورکړي.

د ننګرهار د اطلاعاتو او فرهنګ رياست مسوولينو ويلي، چې دې ولايت په عامه کتابتون کې تر ۱۰ زره پورې بېلابېل کتابونه موجود دي.

‏یاد شوي فرهنګپال په داسې مهال له ننګرهار عامه کتابتون سره د زر ټوکه کتابونو مرسته کړې، چې د افغانستان په ګڼو نورو سيمو کې يو شمېر مشهورو لیکوالو د سختو اقتصادي ستونزو او بېوزلۍ له امله خپل کتابونه ليلام کړي او ځینو حتا د څو سوه افغانیو په ارزښت کتاب د یوې ډوډۍ په بدل کې پلورلی.

د کتابونو د چاپ او سانسور په اړه هم په وروستيو کې طالبانو سخت قیودات وضع کړي، چې پر اقتصادي ناورين سربېره دا قیودات هم د ګڼو خپرندويه ټولنو او د کتاب اړوندو کاروبارونو د سقوط سبب شوی دی.