تاند:( دوشنبه، د جدي شلمه)‏‏ ‏د پښتونخوا ملتپال‏ سياستوال او د ملي جمهوري غورځنګ لارښود افراسياب خټک وايي، چې طالبانو د اسلامي شريعت د تطبيق په پلمه د افغانستان د هويت او ارزښتونو پر خلاف خپلې دښمنۍ ته زور ورکړی.

هغه د دې ډلې د لومړۍ واکمنۍ له وخته ځينې بېلګې يادوي او په شریعت غږ راډیو د افغانستان د ملي راډيو د نوم بدلول، د ملي بيرغ ښکته کول، پر ملي سرود بنديز، د ملي پوځ او نورو بنسټونو له منځه وړل، د بودا مجسمو نړول، د ډيورنډ د داعيې د مدافع ډاکټر نجيب شهیدول او په ټوله کې له ملي هويت او ارزښتونو سره د طالبانو مخالفت له ملي ارزښتونو سره د دوی دښمني ګڼي.

هغه دغه راز لويې جرګې او نورو افغاني ارزښتونو ته نه درناوی د طالبانو نورې دښمنۍ يادوي، چې په وينا يې ملي هويت او ارزښتونو سره يې کوي.

طالبانو د دغه ملتپال سياستوال څرګندونو ته کوم غبرګون نه دی ښودلی.

د يادونې وړ ده، چې طالبان په ټوله کې ځپل تحريک يو اسلامي لښکر ګڼي او په نوم، شعارونو او اهدافو کې يې د ملت پالنې رنګ تت ښکاري.