تاند:( يکشنبه، د جدي نولسمه) د طالبانو د حکومت وياند ذبيح الله مجاهد ادعا کوي، چې کابل کې نن ماسخوتن کومه چاودنه یا جګړه نه ده شوې، بلکې د دوی ځواکونو د انسان تښوونکو خلاف عمليات کړي دي.
نوموړي لیکلي:لږ مخکې د کابل ښار پنځمې حوزې اړوند خوشحال خان سیمه کې څو تنه اختطافګر، چې د تښتونو هڅه یې کوله، د ځانګړو ځواکونو لخوا تعقیب او له پښو وغورځول شول.
ځايي سرچينو بيا په دې اړه بېل بېل نظرونه ورکړي.
يو شمير سرچینې وايي، چې طالبانو په دې سیمه کې د جمهوري نظام د صفر یو قطعې د یوه غړي پر کور عمليات کول، چې سخت غبرګون سره مخ شوي.
ځينو نورو سرچينو ويلي، چې طالبانو د داعش ډلې د غړو خلاف عمليات کول، چې سخت مقاومت سره مخ شول او ځینې نورې سرچينې خو په دې سیمه کې د راکټي بریدونو د ترسره کيدو خبر ورکوي.
په ټولنیزو رسنیو کې یو شمېر فعالانو له خيرخانې سیمې څخه هم د ډزو خبرونه ورکوي، خو طالبانو په دې اړه څه نه دي ويلي.
په وروستيو کې د طالبانو په اړه ادعا کيږي، چې د داعش ډلې پرضد خپلو عملياتو ته د يادې ډلې د فعالیتونو د کمرنګه ښودلو لپاره د اختطافګرو خلاف د عملياتو نوم ورکوي.