تاند:( يکشنبه، د جدي نولسمه) د هرات په شپږمه ناحیه کې کې ناپېژاندو وسله والو تېره شپه یو صراف وژلی دی.
ځايي چارواکو ويلي، چې وژل شوی صراف عبدالرحیم صدیقي نومیده او تېره شپه وژل شوی.
د دوی په وینا، د پېښې په تړاو یې پلټنې پیل کړې دي.
بل لور ته راپورونه وايي، چې د هرات ښار پر ۲۴ سړک په منارونو سیمه کې اوړمه شپه يو دوکاندار خپل کور ته د تلو پر وخت تښتول شوی دی.
هغه تصویرونه چې په ټولنیزو شبکو کې خپاره شوي څرګندوي، چې وسله وال لومړی دوه وروڼه تعقیبوي او د کور مخې ته په رسېدو سره یې یو یې له ځان سره بیايي.
په تصویرونو کې لیدل کېږي، دغه ځوانان لومړی د سړي تښتوونکو په وړاندې مقاومت کوي، خو وسله وال د وسلې په ګواښلو یو تن تښتوي.
څو ورځې مخکې په هرات کې د افغان- ترک لېسې دوه زده کوونکي هم تښتول شوي وو.
په وروستيو کې د افغانستان له مختلفو سيمو څخه د ورته وژنو او اختطافونو خبرونه زيات شوي.
طالبان که څه هم په افغانستان کې د ورته پېښو په د کمولو ادعا کوي، خو د داسې پېښو په اړه خلکو ته ځواب نه وايي.
د بې واکه شوي ولسمشر اشرف غني لومړي مرستيال امر الله صالح څه موده مخکې طالبان تورن کړل، چې د صرافانو او شتمنو خلکو په اختطاف او وژلو کې تر ټولو خلکو دوی ډېر ښکېل دي.
طالبانو په دې اړه کوم غبرګون نه دی ښودلی.