تاند:( شنبه، د جدي اتلسمه) پر ډيورنډ فرضي کرښې د پاکستان او طالبانو د ناندريو له زیاتیدو سره، په ختیځ کې طالب چارواکي د کونړ په څلورو ولسوالیو کې ډیورنډ کرښې سره په صفري نقطه کې د ۳۲ پوستو د جوړولو خبر ورکوي.
په ختیځ کې د طالبانو د سرحدي ځواکونو مشر مولوي ثنا الله سنګين وويل، چې د دې پوستو له جوړېدو سره به د پاکستاني ملیشو لهخوا د هر ډول تاسیساتو د جوړولو مخه ونيسي.
هغه دا هم وويل، چې د یادو پوستو له جوړیدو سره به پاکستان ته پر وخت د ممکنه بریدونو ځواب ويل شي.
د مولوي ثناالله سنګین د معلوماتو له مخې، په صفري نقطو کې یې د يو شمېر پوستو د جوړیدو چارې عملآ پیل کړي هم دي.
د طالب سرحدي قوماندان په خبره، تازه يې د کونړ ناړۍ، دانګام، شلتن، مرورې او اسمار ولسوالیو څخه، چې ډیورنډ کرښې ته څېرمه موقعيت لري، ورغلی او د نويو جوړیدونکو پوستو سیمې یې پکې مشخص کړي دي.
دا په داسې حال کې ده، چې ټاکل شوې د پاکستان د ملي امنيت سلاکار معيد يوسف د يوه لوړپوړي پلاوي په مشرۍ په نيږدې وخت کې کابل ته په سفر راشي.
ويل کيږي، چې هغه به د نورو موضوعاتو ترڅنګ د ډیورنډ کرښې په اړه د طالبانو او پاکستان پر ناندريو له طالب چارواکو سره وغږيږي.