تاند: ( پنجشنبه، د جدي شپاړسمه) د پاکستان پوځ له تحريک طالبان پاکستان سره د طالبانو د کورنيو چارو وزير سراج الدين حقاني په منځګړتوب ترسره شوی اوربند مات او د دې ډلې خلاف د پوځي عملياتو اعلان وکړ.
د پاکستان د پوځ ویاند بابر افتخار وويل، چې د پاکستاني طالبانو د ځپلو لپاره به افغانستان ته نيږدې پر ډیورنډ فرضي کرښې پوځي عمليات پيل کړي.
هغه دا هم وويل، چې د تحریک طالبان پاکستان سره يې د سولې پيل کړې خبرې ځنډولي دي.
هغه د دې پریکړې د دلايلو له ښودلو پرته ویلي: تحريک طالبان داسې شرایط لرل، چې زموږ له نظره د مذاکرې وړ نه وو.
د پاکستان د پوځ ویاند د یادو عملیاتو د جزيياتو په اړه څه نه دي ويلي.
د پاکستاني طالبانو او حکومت ترمنځ شاوخوا دوه مياشتې وړاندې په خوست ولايت د سولې په موخه مذاکرت پيل او په ترڅ کې یې هوکړه وشوه، چې دواړه لوري به په لنډمهاله توګه اوربند او د پاکستان حکومت به شاوخوا شل پاکستاني طالبان له زندانه خوشې کوي.
له دې هوکړې وروسته یو شمېر پاکستاني طالبان د پاکستان له زندانونو خوشې او په خوست کې د حقاني شبکې په همکارۍ پاکستاني طالبانو ته وسپارل شول.
د یادې هوکړې له اعلانیدو سره سم، د تحریک طالبان پاکستان يو شمېر ډلو د دغې هوکړې له مخالفت سره ټینګار وکړ، چې د پاکستان د کفري نظام خلاف به جهاد ته دوام او په پاکستان کې د شرعي نظام د حاکمیت لپاره مبارزه وکړي.
له دې اعلان څخه وروسته، د پاکستان د پوځ خلاف د پاکستاني طالبانو بریدونه ډېر شوي، چې د پاکستان د حکومت او یو شمېر پارلماني استازو او سياستوالو له غبرګونونو سره مخ شوي دي.
د طالبانو د حقاني شبکې مشر او د کورنيو چارو وزير سراج الدين حقاني او طالب وياندويانو د پاکستان د پوځ او تحریک طالبان د مات شوي اوربند په اړه غبرګون نه دی ښودلی.
مخکې د تحریک طالبان پاکستان ځينو مشرانو ځانونه د افغانستان د طالبانو اړوند ګڼلي وو، خو د طالبانو ویاند ذبیح الله مجاهد یی دا ادعا رد کړې او پاکستاني حکومت سره یې پر سولې ټینګار کړی و.