تاند: ( چارشنبه، د جدي پینځلسمه) د طالبانو د امر بالمعروف ادارې له تخار څخه وروسته په بلخ ولايت هم پر خلکو اجباري کړه، چې لمونځونه به په جوماتونو کې په جمع کوي.
په بلخ کې د طالبانو د امر بالمعروف او نهی عنی المنکر ریاست خلکو ته ويلي، چې ۵ وخته لمونځونه دې په جوماتونو کې وکړي، ځکه دوی یې څارنه کوي.
د امر باالمعروف او نهی عنی المنکر ځایي مسوولانو د مزار شریف په روضې جومات کې دوه هم ويلي، چې ښځې يوازې د حجاب له مراعتولو سره کورونو نه د وتو اجازه لري.
همدا روانه اونۍ له تخار ولايت څخه راپور ورکړل شو، چې د طالبانو د امر بالمعروف ادارې مسوولانو د يوه ۷۵ کلن سپين ږيري په ګډون یو شمېر کسان له دې کبله په سیند کې غوپه کړي، چې ګواکې جومات ته د لمانځه لپاره نه دي حاضر شوي.
نن د طالبانو د امر بالمعروف او نهی عن المنکر وزارت ویاند محمد صادق عاکف وويل، چې ټولو محتسبینو ته لارښوونه شوې څو د خلکو پر شخصي حریم تېری ونه کړي.
عاکف زياته کړه: که چېرې کوم محتسب د خلکو پر شخصي حریم تېری وکړي، له دندې به لرې کېږي او قانوني چلند به ورسره کېږي.
د طالبانو د امر بالمعروف وزارت دغه راز په ټولنیزو رسنیو کې له هغې خپرې شوې ویډیو سره خپل تړاو رد کړی، چې د يوه ځوان ويښتان پکې د يوه طالب له لوري پرې کيږي.
د طالبانو امر بالمعروف ادعا کوي، چې دغه کس د دوی اړوند نه دی.
يادې ویډیو او د طالبانو د امر بالمعروف او نورو کسانو دا ډول چلند په ملي او نړيواله کچه توندو غبرګونونو سره مخامخ شوی دی.
منتقدان باور لري، چې د خلکو د اساسي حقوقو او خصوصي حريم نقض او توهین د طالبانو په مفکوره کې ځای لري او ګومان نه کوي چې د امر بالمعروف وزارت يادې څرګندونې د خلکو له تېر ايستلو پرته بل هدف ولري.
دوی طالبان ننګوي، چې که ريښتيا د خلکو د حقونو نقض يې رسمي پالېسي نه وي، نو ژر دې د میلیونونو نجونو پر مخ تړلي مکتبونه بیرته خلاص او د خلکو د شخصي حريم نقضونکي طالبان په علني ډول مجازات او ویډیوګانې یې د رسنيو له لارې خپرې کړي.
طالبه اول دې ځان ته متوجه سه او فکر وکړه چې ته يو داسې ملت سره مخ يې چې خپل تاريخ يې په اسلام ولاړ ده، او د اسلام په دفاع کې يې ډير څه قرباني کړي، خو دا اجباري او پنجابي اکټونه به ستا په تباهي پای ولري.