تاند: ( چارشنبه، د جدي پینځلسمه) راپورونه وايي، چې په ایټالیا کې د افغانستان د سفارت د دیپلوماتانو تر منځ د سفارت په عوايدو او پيسو وهل ټکول سره کړي دي.
ويل شوي، چې دغه وهل ټکول د افغانستان د سفير خالد ذکريا او د سفارت د لومړي سکرتر محمد فهيم کشاف تر منځ شوي دي.
د طالبانو د بهرنيو چارو وزارت بيا په یوه اعلامیه کې ویلي، چې د سفارت مسوولینو د سفارت لومړی سکرتر فهیم کشاف له سفارت څخه ويستی او دا غیر قانوني عمل دی.
يو شمير رسنيو ويلي، چې فهیم کشاف د طالبانو له لوري په ایټالیا کې سفیر ټاکل شوی او د اخ و ډب لامل په همدې اړه جنجال و، خو د طالبانو د بهرنيو چارو وزارت د نوي سفير د ټاکلو موضوع رد کړې ده.
ځينو نورو سرچينو ويلي، چې د سفارت د مسوولینو تر منځ د سفارت د پيسو او عوايدو په ویش جنجال او اخ و ډب شوی دی.
د جمهوري نظام له سقوط او د افغانستان له بې نظامۍ سره په ډېرو بهرنيو هېوادونو کې د افغانستان د سفارتونو له لوري د عوايدو د حیف و میل خبره کېږي.
ويل کيږي، چې په ډېرو سفارتونو کې چارواکو د پيسو لاسته راوړلو او حیف و میل لپاره د جعلي اسنادو جوړولو ته هم زور ورکړی.