تاند:( دوشنبه، د جدي ديارلسمه) په کابل کې د طالبانو امنيتي چارواکو د انسان تښتونې او نورو غلاوو په تور د ۷ تنو د نيولو خبر ورکړی.
باختر اژانس د دوی په حواله وايي، چې تېره شپه د کابل په څلورمه ناحیه کې ۳ تنه د يوه کس د تښتولو په تور نیول شوي.
ويل شوي، چې نیول شویو کسانو د تښتول شوي له کورنۍ څخه ۴ سوه زره ډالره غوښتل.
سرچينې ويلي، چې د نیول شویو کسانو د دوو نورو جرمي شریکانو د نیولو هڅې هم روانې دي.
د یوه بل خبر له مخې: د کابل په يوولسمه ناحیه کې ۴ تنه طالبانو په دې تور نیولي، چې له یوه کس څخه يې ۱۲ سوه افغانۍ غلا کړې.
طالبان وايي، چې غلا شوې پیسې یې د پیسو څښتن ته سپارلي دي.
د طالبانو له واکمنیدو او د اقتصادي او بشري ناورين له شدت سره، چې ميليونونه خلک وزګار شوي او وږي دي، د افغانستان له مختلفو سيمو څخه د جنايي پېښو د زیاتېدو خبرونه ورکول کېږي.
طالبان بيا وايي، چې امنیت یې تر پخوا ښه کړی او دا یې مهمه لاسته راوړنه ده.