تاند:( دوشنبه، د جدي ديارلسمه) طالبان وايي، چې يو شمېر روسي پانګوالو په افغانستان کې ځینو پانګونو ته چمتووالی ښودلی او په دې اړه یې د دوی چارواکو سره لیدلي.
د طالبانو وياند ذبيح الله مجاهد وايي، چې دغو روسي پانګوالو په کابل کې د دوی د رییس الوزرا له یوه مرستیال مولوي عبدالسلام حنفي سره لیدلي.
ويل شوي، چې دغو روسي پانګوالو سره افغان پانګوال هم ملګري وو.
د ذبيح الله مجاهد په خبره، دغو پانګوالو ويلي: د نفتو او ګازو په استخراج، د سي این جي او ال این جي دستګاوو د جوړولو او سمنټو د تولید په برخه کې پانګونې ته لېوالتیا لري.
د طالب وياند د معلوماتو له مخې، د دوی د رییس الوزرا مرستيال مولوي عبدالسلام حنفي د روسي او افغان پانګوالو د دې لېوالتيا هرکلی کړی او ډاډ یې ورکړی چې په افغانستان کې د پانګونې غوره فرصتونه برابر شوي دي.
طالبان د داسې لیدنو او پانګونې ته د بهرنيو پانګوالو د لېوالتیا خبرونه په داسې مهال ورکوي، چې له افغانستان څخه ورځ تر بلې د پانګې د فرار راپورونه په زیاتیدو دي.