تاند: ( جمعه د جدي لسمه) ‏‏‏د افغانستان بی واکه شوی ولسمشر محمد اشرف غني پرون له شاوخوا پینځه مياشتې ځنډ وروسته د افغانستان په وروستيو حالاتو او په ځانګړي ډول د جمهوري نظام د سقوط په اړه ملت او نړيوالې ټولنې ته له ځینو رازونو پرده پورته کړه.

د ښاغلي غني څرګندونو ته د هغه پلويانو او مخالفانو مختلف غبرګونونه وښودل.

په دې لړ کې د حامد کرزي د واکمنۍ د ملي امنيت رييس رحمت الله نبیل او د کرزي د دفتر رييس عبدالکریم خرم، چې اشرف غني له ولسمشر کیدو سره له دندو ګوښه کړي وو، تر ټولو توند غبرګونونه ښودلي دي.

هغوی د ولسمشر غني خیرې دروغ او غولونکي ګڼلي، خو په ټولنيزو رسنيو کې زرګونو عامو افغانانو د ښاغلي غني د وضاحت او دغه راز د اوسني ناورين د سوله ییز او معقول حل په اړه د هغه د طرحې هرکلی کړی دی.

په نړيوالو رسنيو کې د افغانستان د مسايلو مشهور څېړونکي او ژورناليسټ سمیع یوسفزي د ولسمشر غني له دغې مرکې څخه د خلکو پراخ هرکلی د طالبانو پر وړاندې په نړيواله کچه د يوه ستر مقاومت او طالبانو ته د لوی سرخوږي پيل ګڼلی ‌

هغه په دې اړه لیکلي:(( اشرف غنی سره ولسی همدردی اوملاتړ زیاتیږي. د اشرف غنی راڅرګندیدل په دې معنی ده، چې اشرف غنی ورو- د ورو طالب نظام پر ضد یوه سیاسی جبهه خلاصوي))

يوسفزی وړاندې زياتوي:(( د نظامي مقاومت په ځای په نړیواله سطحه د طالب تر واک لاندې د افغانانو د حالت په سر مقاومت پیلوي، چی له امله به یې نړۍ د طالب رژیم له رسمیت پیژندلو ډده وکړي)).

ولسمشر غني په خپله پرونۍ مرکه کې له نړیوالو غوښتي، چې د طالبانو په زوره ترلاسه کړې واکمني په رسميت ونه پيژني.

هغه دا هم ویلي، چې د افغانستان د بشري ناورين د مقابلې، نړيوالو مرستو همغږي کولو او دغه راز د طالبانو د واکمنۍ د ټول شموله کیدو او مشروعيت لپاره طرحې لري.