افراسياب خټک: ط دې د پاکستان لمنه خوشې او ملي مشروعيت پیدا کړي

تاند:( چار شنبه، د جدي اتمه) د پاکستان تر قلمرو لاندې د ملي جمهوري غورځنګ مشر لارښود او ملتپال سياستوال افراسياب خټک وايي، چې له افغانستان سره د همکارۍ او خواخوږۍ په نوم د پاکستان لخوا د افغانستان په اړه د اسلامي همکاریو د سازمان د غونډې کوربه توب هسې یو نمايش و.

د خټک په وینا، پاکستان که ريښتيا د افغانستان خواخوږی وي، په خپل قلمرو کې یې مېشتو کډوالو سره تشدد نه کوي او هم ورڅخه د نورو راوتونکو کډوالو پر وړاندې دروازې نه تړي.

خټک دا هم وويل، چې پاکستان ياده غونډه په ښکاره د افغانستان له بشري ناورين ځپلو سره د مرستې په پلمه جوړه کړې وه، خو واقعيت دا و، چې غوښتل يې د طالبانو د واکمنۍ د مشروعيت موندلو لابي وکړي، خو پکې کامیاب نه شو.

ښاغلی خټک طالبانو ته د نړیوال مشروعيت موندلو په برخه کې د پاکستان د هڅو ناکامۍ ته په اشارې سره طالبانو ته سپارښتنه کوي ږ چې پر پاکستان د تکیې او داسې نورو ناکامو مڅو پر ځای دې په افغانستان کې دننه د خپل ملي مشروعيت لپاره اساسي او ريښتيني ګامونه واخلي.

طالبانو بيا په اسلام اباد کې د پاکستان په کوربه توب د افغانستان د بشري ناورين په اړه جوړه شوې غونډه مثبته او ګټوره ګڼلې ده.

د طالبانو يو بل ملاتړی او د حزب اسلامي مشر ګلبدين حکمتيار هم د یادې غونډې پايلو ته خوشاله دی، خو وايي چې اسلامي هېوادونو عملآ د طالبانو د په رسميت پېژندلو اعلان باید کړی وای، خو د لویدیځ په اشاره یې دا کار ونه کړ.