تاند:( يکشنبه، د قوس اته ویشتمه) د پاکستان صدراعظم عمران خان په افغانستان کې د طالبانو اداره د سقوط له ګواښ سره مخامخ ګڼلې او له نړيوالو یې غوښتي، چې د ژغورلو لپاره یې لاس په کار شي.
هغه په اسلام اباد کې د افغانستان د بشري ناورين په اړه د سعودي عربستان په وړاندیز د اسلامي هېوادونو د سازمان په فوق العاده غونډه کې دا څرګندونې وکړې.
د عمران خان په وینا د طالبانو اداره ختي خپلو کارکوونکو ته معاشونه نه شي ورکولای.
هغه له همدې کبله د دې ادارې د سقوط خبرداری ورکړی او ویلي چې دغه بې نظمه وضعيت حتا د امريکا متحده ايالاتو په ګټه هم نه دی.
عمران خان دا هم وویل، اوس د داعش ډله یو ګواښ دی.
نوموړي زیاته کړه چې داعش پخوا له افغانستانه پر پاکستان بریدونه کړي او د دې ډلې د مخنیوي لپاره په افغانستان کې یوه پیاوړي حکومت ته اړتیا ده.
د پاکستان لومړي وزیر له افغانستان سره د فوري بشري مرستو په تر سره کیدو د ټینګار ترڅنګ وویل، تر څو چې په دې برخه کې شرطونه له منځه لاړ نهشی افغانستان ته به مرستې و نه رسېږي.
پاکستان مخکې هم خبرداری ورکړی و چې که له افغانستان سره عاجلې بشري مرستې ونه شي، په دغه هېواد کې به د داعش او القاعده ډلو په شان ترهګرو ته د فعالیتونو د زياتوالي زمینه برابره شي.
طالبانو مخکې د ملګرو ملتونو په ګډون د ډېرو افغانانو دا خبره رد کړې، چې ګواکې افغانستان بشري ناورين ځپلی او د ترهګریزو فعالیتونو سطحه پکې زیاتیدونکې ده.