تاند:( سې شنبه ، د قوس درويشتمه)‏‏‏‏ د طالبانو د بهرنيو چارو وزارت ويلي، چې د دوی له اجازې او همغږۍ پرته نور د دوی چارواکي له بهرنيو ديپلوماتانو سره لیدلای نه شي.

د دغه وزارت د سياسي چارو رئيس ذاکر جلالي ویلي، چې طالب چارواکي بايد د ديپلوماتانو د لیدنې لپاره د دغه وزارت اجازه پاڼه ولري.

هغه په دې لیدنو کې د بهرنيو چارو وزارت د تشريفاتو رياست د استازو موجوديت هم لازمي ګڼلی.

دا په داسې حال کې ده، چې د طالبانو له واکمنیدو سره د دوی اکثرو چارواکو په کابل کې د پاکستان له سفیر منصور احمد خان سره لیدنې کتنې کولې.

منتقدینو د منصور احمد خان په دفتر کې د طالب چارواکو ورځینی حاضري په دې مانا ګڼله، چې پاکستانی سفیر عملآ د افغانستان حاکم شوی.

خلکو د منصور احمد خان خپل حضور ته د طالب چارواکو د منلو د آمرانه عکسونو خپرولو سره ويل، چې منصور احمد خان د انګريزي استعمار د وايسرای ګانو په شان رول ترسره کوي.

د منصور احمد خان دغه رول د طالبانو په لیکو کې هم د سختو غبرګونونو سره مخ شوی، چې ځينې خلک ورته خوشاله دي او ځينو نورو خلکو ته غلولونکی ښکاري.

د طالبانو وياند ذبيح الله مجاهد څو ورځې مخکې د پاکستان نظام غیر شرعي وباله او د دوی د فرهنګي کمیسیون یوه غړي شهاب الدين لېوال د پاکستان استخباراتي اداره د افغانستان تر ټولو ډېره دښمنه مرجع وګڼله.

د طالبانو یو بل مبلغ جنرال مبين، چې د کابل د امنیه قومندانۍ ویاند و، څو ورځې مخکې په نا څرګند دليل نیول شوی او بندي دی.

ځینې شنونکي باور لري، چې د مبين د نیول کیدو اصلي دلیل د پاکستان خلاف د نوموړي توندې څرګندونې دي.