تاند (دوشنبه، د قوس ۲۲مه) د افغانستان کام اییر خصوصي هوايي شرکت به سر له سبا (سې شنبې/ د دسمبر ۱۴مه) د کابل او تاشکند ترمنځ د سپرلیو الوتنې پیل کړي.
په ازبکستان کې د کام اییر هوايي شرکت دفتر پرون (یکشنبه) تریند خبري اژانس ته وویل «موږ زېری لرو، موږ د دسمبر له ۱۴ څخه تاشکند ته الوتنې بیا پیلوو.»
د کام اییر هوايي شرکت ویندوی وویل چې په لومړي سر کې به په اوونۍ کې دوې الوتنې پیل شي او دا الوتنې به د سې شنبو او شنبو په ورځو وي.
تېره میاشت د کام اییر هوايي شرکت ريیس زمري کامګار باختر خبري اژانس ته ویلي و چې د کابل – تاشکند ترمنځ به د دسمبر په لومړیو کې الوتنې بیا پیل کړي.
د ښاغلي کامګار په وینا په هوايي ترانزیت کې د دوو خواوو ترمنځ یو څه ستونزې وې او اوس حل شوې دي.
خو تریند خبري اژانس وايي چې ازبکستاني چارواکو ورته ویلي چې د کابل او تاشکند ترمنځ د منظمو الوتنو د بیا پیلېدو په اړه معلومات نه لري.
کام اییر هوايي شرکت روانه اوونۍ په تېرو ۴ میاشتو کې د لومړي ځل لپاره د هند ډیلي ته الوتنه وکړه. دغه هوايي شرکت متحده عربي اماراتو ته هم الوتنې پیل کړي دي.