تاند:( سې شنبه، د قوس شپاړسمه)‏‏‏ د طالبانو عمومي مشر ملا هیبت الله، چې دوی يې امیرالمؤمنین ګڼي، په يوه لارښوده پاڼه کې د طالبانو واليانو ته امر کړی، چې خلک لویدیځو هېوادونو ته له تلو انصراف کیدو ته وهڅوي.

نوموړي ويلي، چې د سیاسي یا اقتصادي ستونزو په پلمه دغه تلونکي افغانان، چې ځينې له کم عمره ماشومانو او میرمنو سره غربي هېوادونوته د تللو تکل لري، له ځنیو امنیتي، اخلاقي او نورو بشري ستونزو سره مخ کیږي.

ـ د لارې په اوږدو او کمپونو کې له ناوړه حالاتو سره مخ کیدل ، د ځینو مغرضو برنامو له مخې د تلونکو افغانانو د عقائدو، اخلاقو او معنوي ارزښتونو له خطر سره مخ کيدل او د اوسیدو د جواز لپاره د اسلام او اسلامي نظام خلاف تهمت او جعلي اسنادو برابرولوته مجبوريدل د دغو تلونکو کسانو عمده ستونزې ګڼلي.

د طالب مشر په خبره، بهر ته د تلو پر ځای د ځینو اشخاصو مسلکي وړتیا د هیواد د سوکالۍ او پرمختګ په لاره کې صرف شي، هلته په عادي او حتی په ځینو حقیرو چارو سرته رسولو کې صرف کیږي.

ملا هیبت الله اخوند ويلي، ‍‍له دې امله دې واليان د اړوندو مسئولینو او علماء کرامو په همکارۍ له هغوی سره مخامخ وویني، د هغوی ستونزې دې واوري او د ممکنه حل لارو پیدا کولو په هکله دې ورسره مرسته وکړي.

د طالبانو اميرالمومنين دغه راز امر کړی، چې چارواکي دې د امنیتي تدابیرو د لازیاتوالي هڅه جاري وساتي، چې چاته د ویرې خپرولو فرصت میسر نه وي او په ځانګړې توګه څوک د تجارانو، کسبه کارو او متخصصینو د خدمتونو او فعالیتونو په وړاندې خنډ ایجاد نه شي.

نن د طالبانو د رييس الوزرا يوه مرستيال مولوي عبدالسلام حنفي د ملګرو ملتونو د سرمنشي له ځانګړې استازې سره په لیدنه کې له نړيوالې ټولنې وغوښتل چې په افغانستان کې خپلې نیمګړې پاتې پروژې بشپړې کړي څو له هېواده د کادرونو د تېښتې مخه ونيول شي.

د طالبانو وروستۍ څرګندونې تر پخوا نرمې شوې ښکاري او څرګندوي، چې دوی د متخصصينو له ګډون او همکارۍ پرته د انحصاري حکومتولۍ په ناکامیدو یې ورو- ورو پوهیږي.

له دې سره ځينې شنونکي باور لري، چې طالبان به زر له هېواده د تېښتې پراخ بهير په داسې اعلاميو زر مهار نه کړای شي.