تاند:( دوشنبه، د قوس اتمه) جنوبي کوریا له افغانستان سره د بشري ناورين د مقابلې لپاره د ۳۲ ميليونه ډالرو مرسته اعلان کړه.
د دغه هېواد د بهرنيو چارو وزارت ويلي، چې دا بشري مرسته به د بشري فاجعې د مخنيوي او مهارولو لپاره په کار واچول شي.
د دې مرستې په اړه نور جزییات نه دي ورکړل شوي.
طالب چارواکو هم د دې مرستو د وېش په اړه څه نه دي ويلي.
د دوی له واکمنیدو سره په افغانستان کې ژور اقتصادي او بشري ناورين رامنځته شوی او تر ۲۴ میلیونه پورې افغانان ډوډۍ نه لري.
د طالبانو رييس الوزرا مولوي محمد حسن اخوند څو شپې مخکې له ملي ټلويزيون څخه په خپله خپره کړې لومړۍ غږيږه وينا کې ملت ته ويلي، چې دوی ورسره د ډوډۍ او رزق ژمنه نه وه کړې.
حسن اخوند له ملت څخه وغوښتل، چې د ده په ټکيو ( خدای ته په بغارو شي) څو ډوډۍ ورته مساعده کړي.
د هغه دغو څرګندونو په ټولنیزو رسنیو کې توند غبرګونونه پارولي دي.
د طالبانو مطبوعاتي مبلغينو بيا ويلي، چې حسن اخوند په ولسي او ساده ژبه ملت ته ريښتيا- ريښتيا خبرې وکړې او د دروغو وعدې یې ورنه کړې.