تاند:( جمعه، د قوس پینځمه) د پاکستان د بلوچستان ایالت په کوټه ښار کې د ملګرو ملتونو د کډوالو نړیوالې ادارې ویلي، چې بلوچستان کې به د افغان کډوالو ښوونځیو ته ارتقا ورکړي.
د دغه سازمان یوه مقام اروین پولیکار ویلي، چې د یادو ښوونځیو د ارتقا او اکمالاتو لګښتونه به د دوی اداره ومني.
په بلوچستان کې د افغان کډوالو تر ۴۳ پورې ښوونځي فعاله دي.
نوموړي له ټولو هېوادونو وغوښتل، چې د افغانانو پر وړاندې خپلې پولې پرانیزي او پریږدي، چې په بشري فاجعه کې د را ایسار دغه هېواد اتباع ورته پناه ور وړي او ناورین نه وژغورل شي.
پاکستاني چارواکو په دې اړه څه نه دي ويلي.
په دغه هېواد کې افغان کډوال ډېر ځله د روغتيايي، تعليمي او نورو اسانتياوو له نشتوالي شکایت لري.
دا په داسې حال کې ده، چې افغانستان نه اوس هم په ميليونونه کسان د اقتصادي او بشري ناورين له کبله د وتو هڅې کوي.
پاکستان او ايران د افغان کډوالو پر مخ خپلې دروازې تړلي، خو ويل کيږي چې په قاچاقي لارو لا هم خلک ور روان دي.