تاند:( دوشنبه، د قوس لومړۍ) د ملګرو ملتونو نړیوال سازمان نن په یوه راپور کې خبرداری ورکړی، چې د افغانستان بانکي نظام د سقوط له ګواښ سره مخامخ دی.
رویټرز په دې اړه د ملګرو ملتونو یو راپور خپور کړی، چې پکې د دغه سقوط پایلې خورا خطرناکې ګڼل شوي دي.
د ملګرو ملتونو د UNDP مشر عبدالله الدرداري رویټرز ته ویلي: موږ باید داسې یوه لاره پيدا کړو، چې د افغانستان د بانکي نظام ملاتړ پکې وشي، خو د طالبانو د نه ملاتړ ډاډ پکې موجود وي.
نوموړي له نړیوالو مالي بنسټونو غوښتي، چې له افغانستان سره د بانکي نظام د ژغورلو لپاره یې ګډ کار وکړي او پرې نه ږدي، چې دغه هېواد دا لویه صدمه وویني.
د دغه نړیوال مقام په خبره، د افغانستان اقتصاد تر ۴۰ سلنې را لویدلی، له بانکونو څخه د پیسو ویستل اوج ته رسیدلي او د ډالرو کمښت بیا بله اساسي ستونزه ګرځیدلې ده.
طالبانو په دې اړه کوم غبرګون نه دی ښودلی.
د افغانستان اقتصاد له تېرو څو میاشتو راهیسې چې طالبان پر دغه هېواد واکمن شوي، له بېسارو بدو ورځو سره مخامخ دی.
ویل کیږي چې د طالبانو واکمنیدو ۱۸ میلیونه خلک بې کاره کړي، ۲۴ میلیونه کسان لوږې ځپلي او د ۳ میلیونه خوارځواکۍ ځپلو ماشومانو ژوند عملاً د مرګ ګواښ سره مخامخ دی.
طالب چارواکي بیا وایي، چې وضعیت به عادي او کنټرول کړای شي، خو نیوکه دا ده چې دوی متخصصین نه لري او د نړیوال مشروعیت د نه لرلو له کبله یې افغانستان بدې انزوا ته بیولی دی.