تاند:( دوشنبه، د قوس لومړۍ) د طالبانو د امر بالمعروف او نهی عن المنکر وزارت پرون د افغانستان د ټلویزونونو له مسوولینو سره د یوې غونډې پر مهال دوی ته خپل وضع کړي محدودیتونه اعلان کړل.
د یاد شوي وزارت وزیر شېخ محمد خالد په وضع شویو اته ماده ییزو قیوداتو کې ویلي، چې رسنۍ د هغو ډرامو او ټلویزوني تمثیلونو د خپرولو اجازه نه لري، چې ښځینه وو رول پکې لوبولی وي.
په یوه بله ماده کې د ټلویزون د ښځینه کارکوونکو په اسلامي حجاب ټینګار شوی او دغه راز د هغو بهرنیو فلمونو او سریالونو د خپریدو منع اعلان شوې، چې د طالبانو په نظر د اسلامي شریعت مخالف وي.
همدا شان د هغو سریالونو د خپریدو امر شوی، چې دین او انساني کرامت پکې توهین شوی وي.
د دې ترڅنګ د هغو سریالونو او پروګرامونو په نه خپریدو هم ټینګار شوی دی، چې د انبیاوو او صحابه وو رول پکې لوبول شوی وي.
سربېره پر دې، طالبانو هغه طنزي او تفریحي پروګرامونه هم منع ګرځولي، چې د اشخاصو د توهین او تحقیق سبب ګرځیږي.
له رسنیزو مشرانو سره په دې اړه جوړه شوې غونډه کې د امر بالمعروف وزیر او د طالبانو ویاند ذبیح الله مجاهد دواړو رسنیو ته د دوی د ملاتړ ډاډ ورکړی.
طالب چارواکو رسنۍ له ممبر سره تشبیه کړي او ویلي، چې له دې وسیلې څخه باید خلک خیر ته دعوت کړل شي.
د طالب ویاند په وینا، دوی د رسنیو ملاتړ په هغه صورت کې کوي، چې د ټولنې اصلاح ته کار وکړي او د هېواد لوړې ګټې او اسلامي ارزښتونه په پام کې ونیسي.
همدا شان ټینګار شوی دی، چې رسنۍ باید د بهرني فرهنګ د ترویج د مخنیوي لپاره کار وکړي.
د افغاني رسنیو مشرانو په دې اړه غبرګون نه دی ښودلی، خو له هېواده بهر یو شمېر خبریالانو دا قیودات د رسنیو د تړل کیدو لپاره زمینه سازي ګڼلې ده.