تاند:( شنبه، د عقرب نهه ویشتمه) د طالبانو يوه وياند انعام الله سمنګاني ويلي، چې د دولتي کارکوونکو د درېيو مياشتو ( سنبلې، ميزان او عقرب مياشتو) د معاشونو ورکړه نن په يو ځايي توګه پیل شوه.
نوموړي دا خبره نن پر خپلې ټویټر پاڼې لیکلې او نور جزییات یې په اړه نه دي ورکړل شوي.
د افغانستان سلګونه زره دولتي کارکوونکي د طالبانو له واکمنیدو وروسته د معاشونو له ځنډ څخه سخت شکايتونه لري.
د دوی په وینا، تر دې حده اقتصادي ستونزو سره مخامخ دي چې دندو ته د تلو کرايه ورسره نشته او د کورونو د خرڅ تر څنګ له دې پلوه هم ګڼو ستونزو سره لاس و ګریوان دي.
طالبانو مخکې ځينو وزارتونو او ادارو ته د يوې- يوې ( اسد) مياشتې معاشونه ورکړي وو، خو يو شمېر ادارو د هغې مياشتې د معاشونو له نه تر لاسه کولو هم شکايت درلود.
معلومه نه ده، چې اوس به څومره وزارتونو او ادارو ته معاشونه ورکړل شي؟
طالبانو څه موده مخکې د خپلې کابینې په غونډه کې د معاشونو د نوي نورم د تصويب خبر ورکړی و.
روښانه نه ده، چې په نوي نورم کې به د دولتي کارکوونکو معاشونه څومره کم شوي وي؟