تاند:( جمعه، د عقرب اته ویشتمه) د افغانستان په شمالي ولايت بلخ کې د عصبي ناروغۍ يو تر ټولو مشهور ډاکټر نادر عالمي وژل شوی دی.

نوموړی له باندې يوې نېمې مياشتې راهيسې تښتول شوی او له تښتونکو سره و.

سيمه ييزو خلکو د نوموړي د تښتولو پړه په طالبانو اچوله او ويل يې، چې د دوی د جنګیالیو په لباس کې ۷ تښتونکو تښتولی و.

د ډاکټر عالمي جسد تېره شپه موندل شوی دی.

د هغه د خوشې کولو لپاره خلکو او د‌شمال زون ځینو سیاسي څېرو څو ځله سوشل میډیا يي کمپاينونه ترسره او طالبانو نه د نوموړي د خلاصون غوښتنه وکړه.

طالبانو رد کړې وه، چې ګواکې دغه مشهور ډاکټر دوی تښتولی‌‌.

د افغانستان له مختلفو ولايتونو څخه په وروستيو کې د انسان تښتوونې د پېښو د زیاتېدو خبرونه ورکړل شوي دي.

ويل کيږي، چې په ډېرو داسې پېښو کې مشهور او شتمن کسان هدف ګرځول کيږي او طالب چارواکي هم پکې لاس لري.

طالبانو بيا په دې اړه پر ځان لګولي تورونه ردکړي دي.