تاند:( سې شنبه، د عقرب پینځه ویشتمه )
د افغانستان د نوي موج سياسي بهير مشرې فوزيې کوفي ويلي، چې طالبانو يې نن په کابل کې د ښځينه همکارانو د يوه خبري کنفرانس ممانعت او د کنفرانس ورکوونکو بې احترامي او سپکاوی کړی دی.
مېرمن کوفي پر خپلې ټویټر پاڼې د دوی دفتر ته د طالب جنګياليو د ورتلو او شورماشور ويډيو هم خپره کړې ده.
فوزيه کوفي وايي، چې ښځينه همکارانو يې په بشري مرستو رسولو کې د ښځينه وو د ګډون په اړه خبري کنفرانس بللی و.
نوموړې له ډېرو جزییاتو پرته ویلي، چې طالبانو يې د ښځينه همکارانو بې احترامي او سپکاوی کړی دی.
هغه دغه راز وايي، چې که طالبان وغواړي که ونه غواړي، د بيان او فکر ازادي به دوام ولري.
طالبانو د مېرمن کوفي دغو څرګندونو ته کوم غبرګون نه دی ښودلی.
دوی مخکې هم د ښځينه اعتراضونو او عدالت غوښتونکو حرکتونو پر وړاندې په بد چلند تورن شوي.
فوزيه کوفي له طالبانو سره د افغانستان د جمهوري نظام د سولې د مذاکراتي پلاوي له مخکښو غړو څخه وه.
هغې د طالبانو له واکمنیدو وروسته وويل، چې دغې ډلې د مذاکراتو پر وخت د ښځو د حقونو د تامينولو ډاډ ورکړی و، خو اوس له خپلو ژمنو په شا شوي.