تاند:( سې شنبه، د عقرب پینځه ویشتمه ویشتمه) د خبریالانو نړیوال فدراسیون په یوه اعلامیه کې ویلي، چې د افغانستان ټول خبریالان او رسنیز کارکوونکي د طالبانو د واکمنۍ له کبله تر سختو ګواښونو لاندې دي.
د دغه فدراسیون مشر انتوني بلنجر په دې اعلامیه کې زیاته کړې، چې د خبریالانو پر وړاندې ګواښونه زیات شوي او دوی د طالب وسله والو او نورو ترهګرو ډلو له ځورونو او تاوتریخوالي سره مخامخ دي.
یاده اعلامیه د کابل د څو ورځې مخکې په یوه چاودنه کې د افغان خبریال حمید سیغاني د وژل کیدو په مناسبت خپره شوې ده.
په اعلامیه کې د نوموړي کورنۍ ته تسلیت ویل شوی او د بیان ازادۍ وضعیت د اندیښنې وړ یاد شوی.
د خبریالانو نړیوال فدراسیون له نړیوالې ټولنې غوښتي، چې د افغان خبریالانو د خوندیتوب لپاره لا ډېر ګامونه واخلي.
حمید سیغاني څو ورځې وړاندې د کابل په لویدیځ کې پر یوه ټونس موټر د چاودنې پر مهال ووژل شو.
هغه په دې لایني موټر کې کور ته روان و، چې چاودنه ورباندې وشوه.
د یادې پېښې مسوولیت داعش ډلې پر غاړه اخیستی.
په وروستیو کې د افغان خبریالانو پر وړاندې هره اونۍ د مختلفو بېلا بېلو پېښو خبرونه ورکول کیږي.
د افغانستان د ژورنالیستانو شورا طالب چارواکي د رسنیو په سانسور هم تورن کړي.
ویل شوي، چې د اقتصادي ستونزو او د طالبانو د قیوداتو له کبله تر ۸۵ سلنه پورې افغاني رسنۍ تړل شوي او دا لړۍ په چټکۍ سره نوره هم دوام لري.
طالبان ظاهراً د بیان ازادۍ د ملاتړ ادعا لري، خو د خبریالانو پر وړاندې د شویو پېښو له څېړنو او اقداماتو یې د خبریالانو د دفاع بنسټونه ناراضه دي.