تاند:( يکشنبه، د عقرب در ويشتمه) د امریکا متحده ایالاتو د پراختیایي مرستو ادارې مشر سمنټا پاور ویلي، چې په افغانستان کې د بشري ناورین د فاجعې د رامنځته کیدو د مخنیوي لپاره به د ملګرو ملتونو له اړوندو ادارو سره په همغږۍ ګډ ګامونه واخلي.
سمنتا پاور، د ملګرو ملتونو د نړیوال خوراکي پروګرام له مشر ډیویډ بیسلي سره د لیدنې پر مهال داخبره کړې ده.
سرچینې نه دي ویلي، چې د دوی ګامونه به کله پیل او څنګه به واخیستل شي؟
د امریکا د ژمنه شویو ګامونو په اړه نور جزییات هم نه دي څرګند، چې څومره او څنګه مرستې به له افغان ناورین ځپلو سره کوي؟
د نړیوال خوراکي پروګرام مشر څه موده مخکې وویل، چې دغه سازمان هره میاشت د افغان ناورین ځپلو د لاسنیوي لپاره ۳۳۰ میلیونه امریکایي ډالرو ته اړتیا لري.
د ملګرو ملتونو نړيوال خوراکي پروګرام، د طالبانو له واکمنیدو سره په افغانستان کې حاکمه او اوج ته رسېدلې لوږه د ځمکې پر مخ تر ټولو بد ترین ناورين ګڼلی دی.
د نړیوالو بشري ادارو د وړاندوینو له مخې، په افغانستان کې ۲۳ میلیونه خلک چې له نیمایي څخه زیات نفوس جوړوي، د خوراک ډوډۍ نه لري او ۳ میلیونه له ۵ کلنۍ څخه لږ عمر لرونکي ماشومان د مرګ له بالقوه خطر سره لاس و ګرېوان دي.