تاند:( يکشنبه، د عقرب در ويشتمه) له ايران سره د افغانستان د سوداګرۍ د کمرنګه کیدو له خبرونو وروسته، د افغانستان د سوداګرۍ او پانګونې خونې دا خبرونه رد کړي دي.
د دې خونې مرستيال يونس مومند ویلي، له ایران سره صادرات او واردات په نارمل ډول دوام لري.
مومند وویل چې افغان سوداګرو د روان کال له پیله تر اوسه ایران ته یو میلیارد دالره صادرات درلودل او واردات هم اته میلیونه دالرو ته رسېږي.
د سوداګرۍ خونې مرستيال وايي، افغان سوداګرو قیمتي کاڼي، وچه مېوه، د څارویو پوستکي، مالوچ، زردالو او ځېنې نورې مېوې صادرې کړې دي او برقي وسایل، د تولیداتو لپاره خام مواد او نفتي او خوراکي توکي یې وارد کړي دي.
د ښاغلي مومند په خبره د طالبانو له واکمنېدو سره د یوې میاشتې لپاره له ایران سره سوداګریزه راکړه ورکړه بنده وه خو دا بهیر اوس بېرته عادي شوی دی.
سوداګرۍ خونې په داسې مهال دا خبره کړې، چې خلک بيا د توکيو د بيو له بېساري لوړوالي شکايت کوي.