تاند(سې شنبې، د عقرب ۱۸مه) د استرالیا د ښوونځیو زده کوونکو نجونو د خپل هیواد له حکومت څخه غوښتي چې ۲۰ زره نور افغان کډوال ومني.
د دوی په استازیتوب اولیفا بارتولوسي د خپل هیواد د مهاجرت وزیر الیکس هاوک ته په استولي لیک کې غوښتنه کړې چې لا ډېرو افغانانو ته پناه ورکړي.
دوی ویلي چې په دې له زړه اندېښمنې دي چې افغان ماشومانې د طالبانو تر واکمنۍ لاندې له خپلو لومړنیو بشري حقونو او زده کړو بې برخې شوي دي.
په دې لیک کې د استرالیا د بشري مرستو پر ادارو ږغ شوی چې ۲۰ زره نور افغان کډوال استرالیا ته راولي.
خو دا په داسې حال کې ده چې د استرالیا حکومت وايي ډېر تر ډېره ۳۰۰۰ وېزې یې افغانانو ته په پام کې نیولي دي.
د استرالیايي ښوونځیو نجونو زده کوونکو ویلي چې د طالبانو له واک ته رسېدو سره نجونې حتي د تعلیم له حقه بې برخې شوي دي.
د طالبانو له واک ته رسېدو وروسته د ټولو دولتي ادارو ښځینه کارکوونکې په کورونو کښېنول شوې او له شپږم تر دوولسم پورې یې د نجونو پر مخ ښوونځي بند کړي دي.
طالبانو په وروستیو کې د هرات او یو شمېر شمالي ولایتونو د نجونو لېسې بېرته پرانیستې خو لا هم د پلازمېنې په شمول د اکثرو ولایتونو د نجونو لېسې بندې دي.