تاند:( یکشنبه، د عقرب شپاړسمه) د ایران دولتي ټلویزیون د دغه هېواد د کلنيو پوځي مانوریو د پيل خبر ورکړی دی.
دا مانورۍ په داسې مهال پيل شوي، چې د سيمې ډېر هېوادونه په افغانستان کې د طالبانو له واکمنیدو او نظام ړنګیدو څخه وروسته، د افغانستان له خاورې د داعش، القاعده او نورو ترهګرو ډلو د فعاليتونو د پراختيا له کبله انديښمن دي.
ايران، چې له داعش ډلې څخه د شيعه ضدو بريدونو له امله تر نورو هېوادونو ډېر خطر محسوسوي، د دې ډلې خلاف د طالبانو له مبارزې نهيلی شوی ښکاري.
د ایران مذهبي مشر ایت الله خامنه يي، د افغانستان په مختلفو ولايتونو کې د شيعه ګانو پر جوماتونو د داعش ډلې له خونړيو ځانمرګو بريدونو وروسته امريکا متحده ايالات د دغې ډلې په ملاتړ تورن کړ.
طالبانو د خامنه يې د دغو تورونو او د ايران د پيل شویو پوځي مانوریو په اړه څه نه دي ويلي
څه موده مخکې روسیې او د منځنۍ اسيا مختلفو هېوادونو له افغانستان سره په ګډه پوله کې پوځي مانورۍ تر سره کړې.
چين هم له تاجيکستان سره په ګډه، په افغان پوله کې د ترهګریزو ګواښونو د مهارولو په هدف د ورته مانوریو اعلان کړی دی.