تاند(یکشنبه، د عقرب ۱۶مه) افغانستان او بنګله دېش د ۲۰۲۲ شل اوره جام سیالیو ته په مستقیم ډول ووتل.
خو دوې لوبډلې، چې د شل اوره جام اتلولۍ یې ګټلې وې، په مستقیم ډول د ۲۰۲۲ جام سیالیو ته له وتلو پاتې شوې.
ویسټ انډیز، چې دوه ځلې یې د نړیوال شل اوره جام اتلولي ګټلې او پخوانۍ اتله سریلانکا باید د کولیفای کېدو لپاره نورې مسابقې وګټي چې د ۲۰۲۲ شل اوره جام ته لاره ومومي.
د ۲۰۲۲ نړیوال شل اوره جام سیالۍ په استرالیا کې کېږي.
د ۲۰۲۲ کال نړیوال شل اوره جام ته ۱۲ غوره یا لوړ ټیمونه مخکې تر مخکې غوره کېږي.
بنګله دېش په روان جام کې خپلې ټولې ۵ سیالۍ وبایللې خو د دې لپاره چې په خپل هیواد کې یې د سږ کال په پیل کې استرالیا او نیوزیلنډ ته ماتې ورکړې وه، د ۲۰۲۲ کال په نړیوال جام سیالیو کې یې خپل ګډون تضمین کړ.
ویسټ انډیز په ۵ سیالیو کې ۴ وبایللې. سریلانکا که څه هم ویسټ انډیز او بنګله دېش ته ماتې ورکړه خو د انګلیستان په وړاندې یې په داسې حال کې چې ۵۵ منډې کړې وې، ټول لوبغاړي وسوځېدل.
د ویسټ انډیز او سریلانکا ترڅنګ سکاټلنډ او نامیبیا هم باید له یو لړ سیالیو وروسته د ۲۰۲۲ په نړیوال جام کې د ګډون لپاره ځان ته لار پرانیزي.