تاند:(چارشنبه، د عقرب دولسمه) د پاکستان په چارو کې د بې واکه شوي ولسمشر محمد اشرف غني ځانګړی استازی او په تېرو ولسمشريزو ټاکنو کې د ښاغلي غني د کمپاين مشر عمر داودزی وايي، چې د له هېواده د ولسمشر غني وتل د جمهوري نظام د سقوط دلیل نه دی، بلکې د نظام سقوط او ولسمشر غني ته ورپېښ ګواښونه له هېواده د هغه د وتو سبب شوی دی.
عمر داودزی، چې په يوه ټلويزيوني مرکه کې يې د افغانستان د وروستيو بدلونونو په اړه بحث کاوه، د نظام د سقوط مسووليت يې د ځان په ګډون په ټولو لوریو او چارواکو واچوه، خو ټينګار يې وکړ چې ولسمشر غني د کښتۍ د چلوونکي په توګه تر نورو ډېر مسووليت درلود.
داودزی دا هم وايي، چې د نظام د سقوط په ورځ سهار ۱۰ بجې د طالبانو جنګيالي د ارګ شاوخوا ته رسيدلي وو.
د هغه په وينا، ولسمشر غني د هغې ورځې د مازيګر په ۵ بجو له کابل څخه ووت.
نوموړې له هېواده وتل د غني شخصي پريکړه او حق ګڼي، خو په دې يې ملامتوي، چې ولې کابل ښار ته د طالبانو د ننوتو په مخنيوي نه و کامياب شوی او د امنيتي سکتور همغږي او تدابير يې کمزوري وو.
ښاغلی داودزی دغه راز ولسمشر غني په ۲۰۱۴ کې له ډاکټر عبدالله سره د بې ضرورته ګډ حکومت د جوړولو له کبله نقدوي او وايي دا حکومت سبب شو، چې حکومت په خپلمنځیو ناندريو بوخت او خلکو ته سم خدمتونه ونه رسوي.
داودزی زياتوي، چې ولس سره د حکومت واټن د دې سبب شو، چې په ليرې پرتو سيمو کې خلک طالبانو ته مراجعه وکړي، قضايي حل و فصل ته يې ور وغواړي او په دې ډول حکومت کمزوری او طالبان پياوړي شي.
د ولسمشر غني دا پخوانی استازی دا هم وايي، چې ولسمشر غني د يوې ډلې لخوا انحصار شوی و او دا کار هم د حکومتولۍ د کمزوري کیدو سبب شو.
نوموړی د افغان سولې لپاره د امريکا د مخکيني ځانګړي استازي زلمي خليلزاد په اړه وايي، چې په ځينو برخو کي يې رول مثبت خو په دې اړه ناسم و، چې افغان دولت یې طالبانو سره د سولې توافق کې نه و شامل کړی.