تاند(یکشنبه، د عقرب ۹مه) یوه باري بېړۍ، چې د ترکیې بیرغ پرې لګېدلی او ۳۸۲ پناه غوښتونکي پکې سپاره وو، په خوندي ډول نن سهار وختي د یونان د یوه ټاپو ساحل ته ورسېده.
دا بېړۍ، چې اکثره سپرلي یې افغنان دي، دوې ورځې وړاندې په ایجې سمندرګي کې بې درکه شوې وه.
د یونان د مهاجرت وزارت نن وویل چې د ترکیې مراد ۷۲۹ بیړۍ په (Kos) ټاپو کې د یونان د ساحل ساتونکو له لوري ونیول شوه.
یونان اروپايي هیوادونو ته د افغان، سوري، عراقي او ایراني پناه غوښتونکو لومړنی ټپال دی. اکثره پناه غوښتونکي د ترکیې له خاورې لومړی یونان او بیا د لوېدیځې اروپا په لور ځي.
له کله چې طالبان په افغانستان کې واک ته رسېدلي، اکثره اروپايي هیوادونه اټکل کوي چې د ۲۰۱۵ په شان به د کډوالو سېل د دوی په لور ورمات شي.
په ۲۰۱۵ کې، له افغانستانه د ناټو او امریکا د محاربو ځواکونو له وتلو وروسته څه باندې یو ملیون کډوالو، چې لویه برخه یې د افغانانو او سوریه والو وه، اروپا ته پناه یووړه.
یونان د جمعې په ورځ د دې بېړۍ په اړه، چې نن د یونان ساحل ته ورسېده، له ترک چارواکو وغوښتل چې اجازه ورکړي څو دوی یې بېرته ورستنه کړي.
د تېرې اوونۍ د سې شنبې په ورځ د درو ماشومانو په ګډون ۴ پناه غوښتونکي هغه مهال مړه شول چې بېړۍ یې له ترکیې څخه د یونان خوا ته په لاره کې ډوبه شوه.