تاند:( دوشنبه، د ليندۍ درېیمه) د چين د بهرنيو چارو وزارت وايي، چې وزیر یې وانګ يي نن په یوه سفر قطر ته ځي او هلته به نن او سبا د طالبانو له يوه پلاوي سره وويني.
چینایي چارواکو د دغه سفر او اجنډا په اړه يې نور جزییات نه دي ورکړي.
چين د پاکستان د تر ټولو نیږدې متحد په توګه، په سیمه کې د پاکستان تر څنګ د طالبانو له اصلي ملاتړو څخه ګڼل کېږي.
دغه هېواد د طالبانو له واکمنیدو څخه وروسته، دوي سره ۳۱ ميليونه ډالره او يوه اندازه خوراکي او بشر دوستانه مرسته کړې ده.
چین طالبانو نه مشروط ملاتړ کړی او ویلي، چې د افغانستان په بيارغونه کې به برخه واخلي.
طالبانو د چینايي چارواکو د تازه اعلان په اړه څه نه دي ويلي.
ويل کيږي، چې د طالبانو د رئيس الوزرا لومړی مرستیال ملا برادر هم د يوه پلاوي په ملتيا په دوحه کې دی او ممکن د چینايي پلاوي ليدنه همدغه طالب پلاوي سره وي.