تاند- د بنګله دېش د اسکر (اسکار) کمېټې د (ریحانه) په نوم فلم د خپل هیواد په استازیتوب د اسکر د نړیوالو فلمونو سیالیو ته وړاندې کړی دی.
دا فلم عبدالله محمد سعید جوړ کړی دی.
ریحانه د پوهنتون د طب پوهنځي مرستیال استاده ده چې باید په خپل ژوند کې د یوې ښوونکې، ډاکترې، خور او مور رول ولوبوي او د کور او کار ترمنځ د انډول راوستلو لپاره خوارۍ وګالي.
ریحانه فلم لومړی پلا د فرانسې په کن نړیوال فلم فیستوال کې نندارې ته وړاندې شو او جایزه یې وګټله. وروسته د میلبرن، بوسان، لندن او پینګیاو فیستوالونو ته وړاندې شو.
د دې فلم اصلي لوبغاړې (ازمري بادون) د اسیا پسفیک په فیستوال کې د غوره لوبغاړې جایزه ګټلې ده.
که څه هم دا فلم په بنګله دېش کې جوړ شوی خو په جوړولو کې یې د سینګاپور پوتوکول کمپنۍ او د فرانسې ژیرل پرودکشن ونډه لرلې ده.